الأربعاء 18 ديسمبر 2013

أولا هو "متهم"
ومع ذلك، راسه بتتحلق ( وده امر مهين لنقيب أو لعميد جامعة أو عضو مجلس منتخب، أو نقابي منتخب....أو حتى استاذ جامعة عادي)
بينام على البلاط
بيدفع رشاوي يمين و شمال عشان يعاملوه كويس وهو "بريء" أصلا من أي جرم
بيدفع رشاوي عشان يتحط الكلابشات في ايده في ايد صاحبه بدل واحد جنائي
بيدفع رشاوي عشان يعدي بطانية أو حاجة ينام عليها و تغطيه في القرف ده
كل كام يوم يدخل واحد يلغبط كل حاجتهم، من باب التسلية، وهما بتاع 20 واحد في اوضة. (ما بين دكاترة و مهندسين، و طلبة جامعة "محترمين") على حمام واحد.

اللبس اللي بيلبسوه المفروض "ابيض"، بما انهم ناس محترمين فاكرين نفسهم مثلا زي جيمي، حيلبسوا ترينج عادي... بلاش لاكوست أو ر. لورين، تكتشف مع اول زيارة ان مثلا ابو سوسته ما ينفعش، و مع الزيارة التانية ان ابو ياقه سبعة ما ينفعش... وكل مرة و مرة ياخدوا تجديد 15 يوم وهما في مكانهم، و كل مرة اللبس ما يدخلش لانه مش مطابق للمواصفات اللي ممكن تمشي هنا... و ما تمشيش هناك، على حسب مزاج الباشا. يعني أصلا كلهم محبوسين من غير تهمة.

أهله بيتذلوا عشان ياخدوا إذن زيارة، واحد في الإسبوع لو طالوه، يقف كام يوم من الصبح على رجله لحد ما ياخد الإذن، عشان يدخل لمدة "10" دقايق. في حين زيارة الجنائي كذا ساعة...

في طريق أهله، عشان يدخلوا الدوا أو الأكل، بيتفتشوا كذا مرة، كل حاجة بتتحط في اكياس... كل الدوا، كل العصير،.... و في سكة الأكل، كل عسكري يفتش يدوق حلاوة الأكل، و مافيش مانع يدوق الحلوين حواليه.... مافيش مانع يدوا تعليق لطيف بعد ما الأكل يعدي اختبار التذوق... و ايدهم الجميلة تلعب في الأكل...

لو المعتقل حظه وحش و مراته صغيره، أو اخته راحت، مافيش مانع حد يتحرش بيها لفظا بشكل مباشر... حتى لو معاها راجل تاني. حتى لو كبيرة على فكرة.... سمعت بناس محترمة على النقيض، بس في وسط كله "كلاب" مستني يطلع واحد محترم عشان تكتب اسمه صح؟

على الهامش، المعتقلين بعد شوية وقت، بيظبطوا حالهم جوا السجن، و بيعيشوا الوضع الجديد، و اللي بيزوروهم هما اللي بيتعذبوا، و فلوس الاتنين بتتسرق خمسة هنا... و عشرة هناك... وخمسة هنا... إلخ.

في حالات "عرضية" من الامتهان، منها بعض المعتقلين خرجوا لأهلهم على ايدهم وركبهم (شباب) من باب إذلالهم.

البنات اللي بتخرج، كتير منهم مش بيتكلموا اصلا،

يطلع واحد بقا عذرا في اللفظ "ابن !@#" يقولك، أصل مصر بلد الأمن و الأمان، ولازم يكونوا عملوا حاجة، و أصل احنا ما شوفناش ده بيحصل، و أصل ده حصل إزاي... واحنا وصلنا لكده ازاي ؟؟

اقوله، حضرتك بيحصل، و من قبل الثورة العظيمة كان في ست طيبة بسيطة ابنها قفش عليه ظابط عشان اتاوة مفروضة على "الوصلة" اللي ابنها متحكم فيها في المنطقة، فأخدها هي و بناتها و ابو الولد ... والست الكبييرة المحترمة اتكهربت من صدرها... آه صدرها، و طلعت الغلبانة في فيديو على يوتيوب تقول وانا اعمل ايه... عايزة حد يجيب لي حقي... و شتمنا مبارك...

فاكر يومها كتبت : "مش عايز اكون مصري" قبل الثورة، و ناس كتير زعلت، ازاي تقول كده....

بعد الثورة، فهمت ان في ناس كتير كويسة، تستاهل الواحد يعيش و يموت عشانها، عشان حتى اللي ماتوا عشان الواحد... و أولاده... و أحلامنا...

كل واحد بقا ابن !!! من اللي بيبرر اللي فوق ، انسان مقزز مثير للقيء في وساخته ما يقلش عن اللي قتل، و عن اللي زور دستور، و عن اللي رضى ان مقدرات الناس دي كلها تبقى في ايد عصابة و شوية جهلة و حرامية... و زيه زي ابن !!! اللي كل شوية واجع دماغنا بحوار الإخوان و كلام الإعلام اللي مالوش اي معنى و أغاني الإرهاب إلخ.

يعني، حبيت اقول الكلمتين الي في زوري لولاد ال !@#@ كلهم. عشان انا مش طايق اشكال اهاليهم كلهم. (اظن واضح؟!)

كل المقززين دول كوم، و اللي يطلع يقول اصلهم فاشيين و بتاع، طب و عصام سلطان و ماضي برضه من الفاشيين دول؟ محسوب الكيوت ده منهم؟ بنات الحلاوة و بنات 7 الصبح من الفاشيين ولاد ال!!! دول... ولا انت نفسك انت واهلك و اي واحد زيك هما اساس الفاشية في حياتنا كلنا؟!!!

الإخوة التانيين بتوع #الأدب إلخ، بالله عليكم، قبل ما قلبك يبتدي يتقزز من كلمتين قولتهم، انطق كده و قول ان ولاد !!!! اللي بيكهربوا ستات في صدرهم، و خاطفين اكتر من 10 ألاف واحد من غير تهمة، و بيهينوهم و أهاليهم، و بيعملوا كل الموبقات اللي وجعت دماغنا بيها.... قول ان كلهم !#$#$# قبل ما تبتدي تدينا محاضرة في الأخلاق.... قول ان انت نفسك !#$#@$#@%$# عشان ساكت على كل ده، و عمال تهري في دستور الضلمة، و في شخص السيسي المبجل... ربنا يحرقه و يجمعك بيه في مكان واحد أو يهديك، و يرحمنا منه و من الحكم العسكري و سرقته لفلوس البلد و أحلام الناس.
أحمد عبد الحميد

 
 
   Bookmark and Share      
  
  معلومات عامة عن اللي بيتقبض عليهم

dyn-web.com

أفضل مشاهدة بدقة 768 *1024 أو أعلى باستخدام فاير فوكس أو انترنت اكسبلورر 7